Kalaallit Nunaanni, Savalimmiuni Danmarkimilu eqqumiitsuliortut suleqatigiillutik atuakkiaq meeqqanut saqqummeqqammersoq”Affarmik ataata” tusarnaagassianngorlugu kalaallisut danskisullu oqaasertalik suliaraat.
Oqaluttualiaq Kalaallit Nunaanni Per Blochimit allanneqarpoq, sumiluunniilli pisimasuusinnaalluni: niviarsiaqqap anaanami angutaatitaava naapippaa imminnullu ilinniartussaallutik. Ilaqutariinnik nutaanik pilersitsinermik oqaluttuannguaasoq kissalaartoq, ilaqutariippassuarnit ilisarineqarsinnaagunarpoq.
Atuakkap ”Affarmik ataata”-p naqitanngorlugu saqqummersinneqartup saniatigut atuakkat marluk, kalaallisut danskisullu atuffassissutaasut, tusarnaagassiannguanngorlugit saqqummissapput. Isiginnaartitsisartoq nipilersortartorlu Angunnguaq Larsen “Affarmik ataata”-mik aamma atuakkiortoq Per Bloch, “Halvfar”-imik atuaasuupput. Atuffassissutinut atatillugu nipilersuusiortoqarsimavoq – oqaluttuat tunuliaqutissaattut sulianik. Tamarmik Nuummi immiunneqarput.
Atuagaq tusarnaagassiaq meeqqanut tunngasuutitaq kalaallisut oqaasertaqarluni saqqummersuni siullerpaajussasoq paasinarsivoq. Katti Frederiksen saqqummersitsisarfimmit Iperaq.Com-imeersoq, kalaallisut oqaasertalimmik “Affarmik ataata”-mik ukiaru saqqummersitsisussaq, taama oqaluttuarpoq.
Atuffassissutit nipilersuutitaat nipilersortartunit ukunanngaanneersut suliaraat: Savalimmiut, Kalaallit Nunaat aamma Danmark, tassaasut: Jensia Højgaard Dam-Davidsen, Angunnguaq Larsen, Qillannguaq Berthelsen, Mikkel Engel Gemzøe aamma Per Bloch.
“Eqqumiitsuliornermik pinngorartitsisut arlalissuit pikkorilluinnartullu suleqatigiinnerat nuannerluinnarpoq, taakkumi nipilersuusiornermikkut oqaluttuat illarpalaamik eqqarsalersitsinermillu pilersitsiffigaat”, pattattartoq erinarsortartorlu Jensia Højgaard Dam-Davidsen oqarpoq.
Angunnguaq Larsen nangippoq: “Perip peqataarusunnersunga aperimmanga angerpunga, nutaamik pissanganartumillu misilittagaqarfigilissagakku. Soorlu Pippi Langstrømpe oqartoq: Misilinnikuunngilara, taamaammat sapernavianngilara.”
Qungujunnartoq ilumoorsaartorlu
Oqaluttuap, angajoqqaat qimakkaangata misigissutsinik aqqusaassallugit pingaaruteqartunik artornartunillu, meeqqat inersimasullu eqqarsalersitsillugillu oqaasinngortitsisinnaalersissavai. Peqatigitillugu oqaluttuaq qungujunnartuliaavoq, ilaatigut flødebollenik ullaakkorsiornermik, nutsanik perlaasinnaanermik pissartaanermik aamma naluttarfimmi eqalussuaqarneranik imaqarluni.
Atuakkat tusarnaagassiat “Halvfar” aamma “Affarmik ataata” suliarineqarnerinut tapiisuupput Tapiissuteqartarfik Sermeq, Nuna Fonden aamma Namminersorlutik Oqartussat Kulturimut Aningaasaliissutaat. Taakku nipilersukkanik tusarnaartarfinni, atuakkanik atuffassissutinik tusarnaartarfinni aamma Soundcloud aqqutigalugit tusarnaarneqarsinnaapput:
https://soundcloud.com/perbloch
Atuagaq “Halvfar” saqqummersitsisarfik Forlaget Albert aqqutigalugu saqqummerpoq, atuakkiortuuvoq Per Bloch titartagartalersuisuulluni Cato Thau-Jensen. Kalaallisoortaa “Affarmik ataata” saqqummersitsisarfik Iperaq.Com aqqutigalugu ukiaru saqqummissaaq.